SCULPTURA TRANSIBLA DA MATIAS SPESCHA A TRUN
AVIERT PER TUTS
Igl enconuschent artist Matias Spescha relai cun OGNA in'ovra unica ed attractiva cun gronda radiaziun. Tenor siu giavisch eis ella accessibla alla publicitad da tut il temps e duront igl entir onn ora.
La vischnaunca da Trun – liug da sia naschientscha – ei s'engaschada per la realisaziun dalla scultpura ed ha mess a disposiziun il terren. Numerus promoturs ein segidai finanzialmein da realisar l'ovra ch'ei vegnida inaugurada il matg 2013.
La pli gronda sculptura transibla dalla Svizra schai amiez ils imposants cuolms dalla Surselva e fuorma cun ella in'unitad nunusitada, meditativa ed extrarodinaria. Fenomenal ei era l'acustica egl intern dalla sculptura che inspirescha adina puspei artists ed atistas per concerts e performanzas.
Vus essas cordialmein envidai da visitar l'OGNA. La pli gronda sculptura transibla en Svizra schai enamiez ils cuolms grischuns e fuorma cun els ina unitad nunusitada, solemna ed admirabla.
OVRA MONUMENTALA
L'ovra monumentala ei impressiunonta: La construcziun aviarta viers tschiel mesira 48 m ella lunghezia, 30 m ella ladezia e 5.5 m ell'altezza. Las preits da betun d'ina fermezzia da 30 cm, colligiadas ina cun l'autra, schaian sin fundaments da bindel.
Il spazi intern, suleraus cun in sempel terren marnus, ei accessibels neu dil sid atras in'avertura da preit.
Las preits egl intern dalla sculptura ein ornai cun maletgs digl artist che cuvieran grondas parts dalla surfatscha, gest sco quei ch'el haveva previu en siu model. En paucs loghens da quei spazi
ein plasticas digl artist plazzadas.
SPAZI SPESCHA
Naven dils 17 da zercladur vegn il relasch digl art da Matias Spescha presentaus alla publicitad datier dall'OGNA: en ina gronda halla industriala dall'anteriura fabrica da ponn a Trun - 10
minutas a pei.
Ina viseta el SPAZI SPESCHA ei ina ideala cumplettaziun digl eveniment OGNA. L'exposiziun ei aviarta entochen ils 29 d'october 2023 mintgamai mesjamna tochen dumengia denter las 14 e 17 uras.
Ella porscha ina profunda investa ella lavur digl artist. Ell'exposiziun da quest onn san ins contemplar ovras pli grondas ch'igl artist ha conecpiu ils davos dus decennis da sia veta egl
atelier a Bages el sid dalla Frontscha. Ellas vegnan presentadas per l'emprema gada en Svizra.
10 ONNS OGNA
La sculptura ch'ei vegnida inaugurada 2013 festivescha 2023 si'existenza da 10 onns. A quella caschun ei la construcziun da betun vegnida sanada. Las picturas muralas e las plasticas egl intern ein medemamein vegnidas renovadas sco era la via che meina alla sculptura. Nus engraziein a tuts fauturs e donaturs per lur sustegn.